Ahadi Bora zaidi ya Mungu

Ikiwa Mungu hakumhurumia mwana-wake mwenyewe, bali alimtoa kwa ajili yetu sote, atakosaje basi kutupatia vitu vyote kwa ukarimu pamoja naye ? (Warumi 8:32)

Ahadi ya Mungu ya neema ya baadaye yenye kufika mbali zaidi inapatikana katika Warumi 8:32. Huu ndio mstari wa thamani zaidi katika Biblia kwangu. Sehemu ya sababu ni kwamba ahadi iliyomo ni ya kina sana kiasi kwamba iko tayari kunisaidia katika kila hatua ya maisha yangu na huduma yangu. Hakujawahi kutokea, na haitatokea kamwe, hali yoyote katika maisha yangu ambapo ahadi hii itakosa umuhimu. 

Peke yake, ahadi hiyo ya kina pengine isingefanya mstari huo kuwa wa thamani zaidi. Kuna ahadi nyingine kubwa kama vile Zaburi 84:11: “Hakuna kitu chema ambacho [Mungu] anawanyima wale wanaotembea kwa unyofu.” Na 1 Wakorintho 3:21–23: “Kila kitu ni chenu, iwe Paulo au Apolo au

Kefa au ulimwengu au maisha au kifo au mambo ya sasa au ya baadaye — vyote ni vyenu, nanyi ni wa Kristo, na Kristo ni wa Mungu.” Ni vigumu kuelezea kwa ukamilifu ukubwa na upeo wa ahadi hizi za ajabu. 

Hakuna wakati ambapo ahadi ya Warumi 8:32 itakosa umuhimu. Ahadi hii haiwezi kushindwa. Ikiwa Mungu alimtoa Mwanawe kwa ajili yetu, atatupa vitu vyote tunavyohitaji!

Lakini kinachofanya Warumi 8:32 kuwa ya kipekee ni mantiki inayozalisha ahadi hiyo na kuifanya kuwa thabiti na isiyoyumbishwa kama upendo wa Mungu kwa Mwana wake anayevutia sana. 

Warumi 8:32 ina msingi na dhamana ambayo ni imara sana na thabiti kiasi kwamba hakuna uwezekano wowote kwamba ahadi hiyo inaweza kuvunjwa. Hii ndiyo inayoifanya kuwa nguvu ya kudumu wakati wa misukosuko mikubwa. Lolote lingine litakaloanguka, lolote lingine litakalokatisha tamaa, lolote lingine litakaloshindwa, ahadi hii ya neema ya baadaye haiwezi kushindwa kamwe.

"Yeye ambaye hakumhurumia Mwanawe mwenyewe bali alimtoa kwa ajili yetu sote… " Huo ndiyo msingi. Ikiwa hili ni kweli, inasema mantiki ya mbinguni, basi Mungu atawapa kwa uhakika kamili vitu vyote wale ambao aliwapa Mwana wake!