Mahitaji Yetu Mawili ya Muhimu Zaidi

Kwa kanisa la Wathesalonike katika Mungu Baba yetu na Bwana Yesu Kristo. (2 Wathesalonike 1:1)

Sisi kama kanisa tuko "ndani" ya Baba na "ndani" ya Bwana. Hii ina maana gani?

Neno “Baba” linamaanisha hasa kujali, kukuza, kulinda, kulea, na nidhamu. Kwa hivyo, kuwa “ndani” ya Baba kunamaanisha hasa kuwa chini ya utunzaji na ulinzi wa Mungu kama Baba yetu wa mbinguni.

Jina lingine ni Bwana: Tuko ndani ya Bwana Yesu Kristo. Neno “Bwana” linamaanisha hasa mamlaka, uongozi, na umiliki. Kwa hivyo, kuwa “ndani” ya Bwana kunamaanisha hasa kuwa chini ya usimamizi, chini ya mamlaka, na katika umiliki wa Yesu kama Bwana wetu mkuu.

Kwa hiyo, Paulo analisalimia kanisa la Thesalonike kwa namna ya kuwakumbusha kwamba wao ni familia (chini ya uangalizi wa Baba) na kwamba wao ni watumishi (chini ya usimamizi wa Bwana). Maelezo haya mawili ya Mungu kama Baba na Bwana, na hivyo kanisa kama familia na watumishi, yanalingana na mahitaji yetu mawili ya muhimu zaidi.

Kila mmoja wetu ana haja ya kuokolewa na kusaidiwa, kwa upande mmoja, na haja ya kusudi na maana, kwa upande mwingine.

1. Tunamhitaji Baba wa mbinguni atuhurumie na kutuokoa kutoka kwenye dhambi na taabu. Tunahitaji msaada wake kila hatua, kwa sababu sisi ni dhaifu sana na tuko kwenye mazingira magumu.

2. Tunamhitaji pia Bwana wa mbinguni atuongoze maishani na kutuambia kilicho cha busara na kutupa jukumu kubwa na lenye maana la kutimiza, na sababu ya kuishi, matumizi fulani kwa jinsi Mungu alivyotuumba. Hatupendi tu kuwa salama chini ya uangalizi wa Baba — ingawa ni muhimu na tunahitaji hilo. Tunataka kusudi tukufu la kuishi kwalo.

Tunataka Baba mwenye huruma awe Mlinzi wetu, na tunataka Bwana mwenye nguvu zote awe Bingwa wetu, Kamanda wetu, na Kiongozi wetu katika kusudi kuu. Kwa hiyo, Paulo anaposema katika mstari wa 1, Ninyi ni kanisa “katika Mungu Baba na Bwana Yesu Kristo,” tunaweza kupumzika na kusaidiwa kutoka kwake yeye — Mungu ni Baba yetu! Na tunaweza kupata ujasiri na dira kutoka kwa mwengine - Yesu ni Bwana wetu!