Upendo wa Sasa na Wenye Nguvu

Ni nani atakayetutenga na upendo wa Kristo? Je, dhiki, au shida, au mateso, au njaa, au utupu, au hatari, au upanga? (Warumi 8:35)

Angalia mambo matatu katika Warumi 8:35.

1. Kristo anatupenda sasa.

Mke anaweza kusema kuhusu mume wake aliyekufa: Hakuna kitakachonitenga na upendo wake. Anaweza kumaanisha kuwa kumbukumbu ya upendo wake itakuwa tamu na yenye nguvu maisha yake yote. Lakini hivyo sivyo Paulo anavyomaanisha hapa.

Katika Warumi 8:34 inasema waziwazi, "Kristo Yesu ndiye aliyekufa - zaidi ya yule aliyefufuka - aliye mkono wa kuume wa Mungu, ambaye kwa kweli hutuombea." Sababu ya Paulo kusema kwamba hakuna kitu kitakachotutenga na upendo wa Kristo ni kwa sababu Kristo yu hai na bado anatupenda sasa hivi.

Yuko mkono wa kuume wa Mungu na kwa hiyo anatawala kwa ajili yetu. Naye anatuombea, ambayo ina maana kwamba anahakikisha kwamba kazi yake ya ukombozi iliyokamilika inatuokoa saa baada ya saa, na kutuleta salama kwenye furaha ya milele. Upendo wake sio kumbukumbu tu. Ni kitendo cha kila wakati na kila dakika cha Mwana wa Mungu mwenye uweza wote, aliye hai, kutuleta kwenye furaha ya milele.

Ni nani atakayetutenga na upendo wa Kristo? Je, dhiki, au shida, au mateso, au njaa, au utupu, au hatari, au upanga?

2.  Upendo huu wa Kristo unafaa katika kutulinda dhidi ya kutengana, na kwa hiyo si upendo wa ulimwengu wote kwa wote, lakini upendo wa pekee kwa watu wake - yaani, wale ambao, kulingana na Warumi 8:28 wanampenda Mungu na wameitwa kulingana na kusudi lake.

Huu ndio upendo wa Waefeso 5:25, “Enyi waume, wapendeni wake zenu, kama Kristo naye alivyolipenda Kanisa, akajitoa kwa ajili yake.” Ni upendo wa Kristo kwa kanisa, bibi-harusi wake. Kristo ana upendo kwa wote, na ana upendo maalum, unaookoa, unaohifadhi kwa bibi-harusi wake. Unajua wewe ni sehemu ya bibi-harusi huyo ikiwa unamwamini Kristo. Mtu yeyote — bila ubaguzi — mtu yeyote anayemwamini Kristo anaweza kusema, Mimi ni sehemu ya bibi harusi wake, kanisa lake, walioitwa na kuchaguliwa kwake, wale ambao, kulingana na Warumi 8:35, wanahifadhiwa na kulindwa milele bila kujali chochote.

3.  Upendo huu wenye uwezo wote, wenye ufanisi, unaolinda hautuepushi na majanga katika maisha haya, bali hutuvusha salama kupitia hayo hadi furaha ya milele pamoja na Mungu.

Kifo kitatupata, lakini hakitatutenganisha. Kwa hiyo Paulo anaposema katika mstari wa 35 kwamba “upanga” hautatutenganisha na upendo wa Kristo, anamaanisha: hata tukiuawa, hatujatengwa na upendo wa Kristo.