Zungumza na Machozi Yako

Wapandao kwa machozi watavuna kwa vigelegele vya furaha! Yeye atokaye akilia, akibeba mbegu ya kupanda, atarudi nyumbani kwa kelele za furaha, akiwa na miganda yake. (Zaburi 126:5-6)

Hakuna kitu cha kusikitisha juu ya kupanda mbegu. Haina kazi sana kama kuvuna. Siku zinaweza kuwa nzuri. Kunaweza kuwa na matumaini makubwa ya mavuno.

Lakini zaburi hiyo inazungumza juu ya kupanda “kwa machozi.” Inasema kwamba mtu “huenda zake akilia, akibeba mbegu ya kupanda.” Hivyo basi, kwa nini wanalia?

Nadhani sababu sio kwamba kupanda kuna huzuni, au kwamba kupanda ni kugumu. Nadhani sababu haina uhusiano wowote na kupanda. Kupanda ni kazi inayopaswa kufanywa, hata kama kuna mambo katika maisha ambayo yanatufanya tulie.

Mazao hayatasubiri tunapomaliza majonzi yetu au kutatua shida zetu zote.

Ikiwa tutakula majira ya baridi yajayo, lazima tutoke kwenda shambani na kupanda mbegu, iwe tunalia au la.

Ukifanya hivyo, ahadi ya zaburi ni kwamba "utavuna kwa vigelegele vya shangwe." "Utarudi nyumbani kwa vigelegele vya shangwe, ukileta miganda [yako] pamoja nawe." Sio kwa sababu machozi ya kupanda huleta furaha ya kuvuna, bali kwa sababu kupanda tu huleta mavuno, na unahitaji kukumbuka hili hata machozi yako yanapokujaribu na kukufanya uache kupanda.

Kwa hiyo, hapa kuna funzo: Wakati kuna kazi rahisi na za moja kwa moja za kufanya, na umejaa huzuni, na machozi yanatiririka kwa urahisi, endelea na fanya kazi hizo ukiwa na machozi. Kuwa halisi. Sema na machozi yako, "Machozi, nakuhisi. Unanifanya nitake kukata tamaa ya maisha. Lakini kuna shamba la kupandwa (vyombo vya kuoshwa, gari la kutengenezwa, mahubiri ya kuandikwa).”

Kisha sema, kwa msingi wa neno la Mungu, “Machozi, najua kwamba hutabaki milele. Ukweli kwamba ninafanya tu kazi yangu (hata nikiwa na machozi) mwishowe yataleta mavuno ya baraka. Kwa hivyo basi, endelea kutiririka ikiwa ni lazima. Lakini ninaamini - ingawa bado siioni au siihisi kikamilifu - ninaamini kwamba kazi rahisi ya kupanda kwangu italeta miganda ya mavuno. Na machozi yangu yatageuzwa kuwa furaha.”