Hujachelewa Bado

Tumaini Katika Vita Dhidi ya Ponografia

Makala imeandwika na David Mathias

Mhariri Mkuu, desiringGod.org

Niliweza kuona maumivu machoni mwake. Na hofu.

Swali lake lilihusu ukosefu wake wa uhakika wa wokovu, na ilikuwa rahisi kuona kwamba hili halikuwa jambo la kifalsafa au la kinadharia tu. Ilikuwa ghasia ya roho juu ya dhambi fulani inayomsumbua.

Ilichukua swali moja tu la kufafanua ili kugundua chanzo: hatia juu ya kurudi kwake mara kwa mara kwenye ponografia ya mtandaoni. Lilikuwa jambo zuri kwamba alijihisi mwenye hatia, na nilimwambia hivyo baadae kidogo. Ilikuwa ishara ya neema ya Mungu.

Kwa sasa, hali kama hiyo haikuwa mshangao katika huduma ya chuo kikuu. Hapa kwenye chuo kikuu cha Kikristo, suala la kichungaji lililojitokeza zaidi kuliko mengine yote lilikuwa uhakika wa wokovu. Na baada ya kuchanganyikiwa awali na mazungumzo kadhaa ya muda mrefu, mkosaji alijulikana haraka. Ponografia na kujichua.

Leo, kama mkisikia sauti yake, msiifanye mioyo yenu kuwa migumu.

Janga Katika Kizazi Hiki

Uhakika wa wokovu unaweza kuwa chini kabisa miongoni mwa Wakristo kutokana na janga la matumizi ya ponografia kupitia upatikanaji wa mtandao kila mahali. Wakati mwingine inachukua sura ya wasiwasi wa kimaisha na kuchanganyikiwa kwa maarifa, lakini mara nyingi ukosefu wa uhakika ni matokeo ya dhambi iliyokita mizizi. Je, naweza kweli kuokolewa ikiwa nitaendelea kurudia dhambi ile ile ambayo nimeapa mara nyingi kutorudia tena?

Hivi karibuni tuliwahoji wasomaji 8,000 wa Desiring God. Utafiti wetu uligundua kuwa matumizi ya ponografia yanayoendelea si tu kwamba ni ya kawaida sana, bali pia yanaongezeka zaidi miongoni mwa vijana watu wazima. Zaidi ya asilimia 15 ya wanaume Wakristo wenye umri wa zaidi ya miaka sitini walikiri kutumia ponografia mara kwa mara. Ilikuwa zaidi ya 20% kwa wanaume wenye umri wa miaka hamsini, 25% kwa wanaume wenye umri wa miaka arobaini, na 30% kwa wanaume wenye umri wa miaka thelathini. Lakini karibu 50% ya wanaume Wakristo wanaokiri imani, wenye umri wa miaka 18-29, walikiri kutumia ponografia mara kwa mara. (Utafiti uligundua mwelekeo sawa miongoni mwa wanawake, lakini kwa viwango vya chini zaidi: 10% ya wanawake wenye umri wa miaka 18-29; 5% katika miaka yao ya thelathini; na kupungua zaidi kwa wale wa miaka arobaini, hamsini, na zaidi ya sitini.)

Upatikanaji wa ponografia mtandaoni unaweza kuwa mpya kwa kizazi hiki, lakini mwaliko wa kutubu ni wa zamani sana.

Sikia Sauti Yake Leo

Ingawa suala la upatikanaji wa ponografia mtandaoni linaweza kuwa jipya kwa kizazi hiki — na linaweza kuwa na athari mbaya zaidi kwa wale waliokutana nalo wakiwa wadogo — mwaliko wa kutubu dhambi za mara kwa mara ni wa zamani sana. Na labda hakuna maandiko ya kibiblia yanayohusiana zaidi na changamoto za leo kuliko Waebrania sura ya 3 na 4.

Kitabu cha Waebrania, chenye umri wa milenia mbili, kinaelekeza hata zaidi nyuma katika historia, kwa mwaliko wa Mungu wa kutubu katika Zaburi 95:7–8: “Leo, kama mkisikia sauti yake, msiifanye mioyo yenu kuwa migumu” (Waebrania 3:7–8, 13, 15; 4:7). Ingawa ofa hii ya kupumzika imekuwepo kwa karne nyingi, matumizi yake kwa waumini yanahusishwa na wale ambao bado hawajafanya mioyo yao kuwa migumu kabisa katika kutoamini na kuacha kutubu.

Kitabu cha Waebrania kiliandikwa kwa kundi la Wakristo wa Kiyahudi walioteswa ambao walikuwa na majaribu ya kuacha kumwabudu Yesu kama Masihi (sababu ya mateso yao) na kurudi kwenye Uyahudi waliokuwa wakifuata kabla ya Yesu. Si tu kwamba hatua kama hiyo ni janga la theolojia (kwa namna mtu anavyomwelewa Mungu na ufunuo wake), bali pia ni maangamizi ya kibinafsi na ya milele. Wakristo hawa wa mwanzo walikuwa wakipitia ugumu wa mioyo sawa na ule unaoambatana na dhambi za mara kwa mara na kutoamini kwa Wakristo wanaokiri imani leo.

Katika muktadha kama huo, Waebrania wanarejea Zaburi 95 na himizo la moja kwa moja inalotoa: “Leo, mkisikia sauti yake, msifanye mioyo yenu kuwa migumu.” Ni neno ambalo kizazi chetu kinahitaji kusikia hasa.

Ikiwa Bado Unamsikia

Msisitizo kwenye “leo” ni muhimu. Kesho haijahakikishwa. Ulichonacho ni sasa hivi.

Ukisikia sauti ya Mungu leo — ikikuita kwa Kristo na utakatifu wake — na ukatae sauti hiyo, moyo wako utakuwa mgumu kwa kiwango fulani, na usichukulie kuwa utakuwa na wiki ijayo, mwezi ujao, mwaka ujao, au hata kesho kupata toba.

Kila mara tunapopuuza sauti ya neema inayotushawishi, tunakaribia hatua moja zaidi kuelekea katika hukumu. Kila mara tunapoikubali dhambi kwa kukusudia, tunaitia giza roho na kuongeza ugumu moyoni. Wakati fulani, hakuna joto wala ulaini utabaki. Kisha, kama Esau, ambaye “hakupata nafasi ya kutubu” (Waebrania 12:17), itakuwa umechelewa.

Tumaini letu kuu dhidi ya ponografia haliko kwetu sisi wenyewe, bali kwa Kristo, ambaye ameshinda, na ndani yake nasi pia tutashinda.

Lakini leo — leo — ikiwa bado unasikia sauti yake ya neema kwa msukumo wa Roho wake, ikiwa bado unahisi mwenye hatia, ikiwa bado unahisi aibu, ikiwa bado unajua kuchukia uchafu wa dhambi — fanya leo kuwa siku yako ya kugeuka. "Angalia usimkatae yeye anayezungumza." (Waebrania 12:25).

Ni vizuri kwamba unajisikia vibaya kuhusu dhambi zako zinazoendelea. Huo ni mguso wa neema. Bado una nafasi ya kugeuka kutoka kwenye baridi ya dhambi hadi kwenye joto la Kristo anayesamehe. Kama moyo wako ulikuwa mgumu kupita kiasi cha kurekebishwa, usingesumbuliwa na dhambi. Kushawishika kwako ni wema wake.

Maadamu Bado Ni Leo

Fanya leo ihesabike kwenye mpango mpya katika mapambano. Acha dhambi wakati bado unaweza kuwa na moyo wa kufanya hivyo. Mshirikishe rafiki Mkristo katika mapambano yako, ambaye unaweza kushiriki naye neema ya thamani isiyo na kifani ya Waebrania 3:12–13:

Jihadharini, ndugu, ili asiwepo yeyote miongoni mwenu mwenye moyo mbaya na usioamini, ambao unaweza kumwondoa kutoka kwa Mungu aliye hai. Lakini himizaneni kila siku, maadamu inaitwa “leo,” ili yeyote miongoni mwenu asije akafanywa mgumu kwa udanganyifu wa dhambi.

Chagua haki leo. Kila kukumbatia utakatifu kwa dhati ni muhimu. Kila chaguo dhidi ya uovu, kila kitendo cha haki moyoni, akilini na mwilini. Kila kukataa dhambi kunakuandaa, angalau kwa kiwango kidogo, kuchagua haki wakati ujao. “Siku zote tunakuwa jinsi tutakavyokuwa” (Joe Rigney, 'Live Like a Narnian', 52), na leo ina umuhimu mkubwa. Sasa hivi ni muhimu.

Mahali Tunapoweka Matumaini Yetu

Na muhimu zaidi, elekeza macho yako upya leo kwa mtetezi wako na kuhani mkuu, ambaye anaweza “kuchukuana nasi katika udhaifu wetu” na “ambaye katika kila hali alijaribiwa kama sisi, lakini bila dhambi” (Waebrania 4:15). Yuko tayari kutoa huruma na kutuma neema “ya kutusaidia wakati wa shida” (Waebrania 4:16). Tunasema hapana kwa dhambi kwa kusema ndiyo kwa Furaha ndani yake.

Hapa, katika mkono wa kulia wa Mungu, ndiko matumaini yetu ya mwisho yanapokaa. Sio katika uwajibikaji wetu, au maazimio yetu, na hakika sio katika nia yetu. Sio katika rekodi yetu ya zamani, wala uwezo wetu wa sasa, wala uwezo wetu wa baadaye. Matumaini yetu makubwa hayako ndani yetu wenyewe, bali nje yetu, kwa Kristo, ambaye ameshinda, na ndani yake nasi pia tutashinda.